Freitag, 21. Januar 2022

 

Das wiirt ja immer schüüner….!

 

Etz wänd-s’ sogaar äm Papscht ä Schpägg

mit Avikaatä-Mittel;

Missbüüch und nämä derä Drägg,

ä grauävolls Kapitel.

 

Är häig schiints nämä-n-äinä teggt

i seggsuellä Sachä;

und daas Eräignis hätt erreggt;

das törff mä halt nüd machä!

 

We schtaht etz g Chilchä wider daa,

wänn gaar dr Papscht vrsäit;

das richtet eeländ Schadä-n-aa

für iätz und d Eebigkäit!

 

 

-y.


Donnerstag, 13. Januar 2022

 

Säg was-d‘ witsch – Tschoggowitsch!

 

De mached äs Tärämtämtämm

z Auschtraaljä übrännä;

für ds Tennisschpilä bim Gränd Släm

mit Schpeerä und mit Männä.

  

Dr Tschoggowitsch, der Super-Schtaar,

well-mä nüd inäluu,

der Kärli well mit Huut und Haar

gar nüd zum Impfä guh.

 

Dr äi säit gix und disä gax,

wer wäiss, we’s usächunnt;

dr äi säit ja und disä mag's;

isch daas nüd kunterbunt?

 

-y.


Dienstag, 11. Januar 2022

 

 

                                Dr eltisch Glaarner…*

 

 

Mä säit:                           Dr eltisch Glaarner sig

                                        dr Füh.

                                        Das mag ja sii

                                        und ich schu rächt und schüü.

 

Mä gseht:                        Nuch ächlä-n-elter isch

                                        dr Niid.

                                        Dr Füh vrgaht,

                                        Vrguuscht tuät we

                                        nüd gschiid.

 

Mä gmerggt:                    As ds Zändweh

                                        nuch viil elter isch,

                                        wänn dä dr rächt

                                        dii liäbä Naachpuur isch.

 

Mä gkört:                         Wänn äinä-n-öppis häig,

                                        nüpfiil,

                                        so sig dä daas

                                        für disä halt

                                        schu z’viil.

 

Mä tänggt:                       Äs täät’s doch äigetli

                                        äm Füh.

                                        Nää – uhni Niid

                                        wäär ds Läbä

                                        nüd so schüü.

 

                                        Fridli Osterhazy

 

 

                                        *schtatt ä-n-ärä Eerschtaugschtäreed uff Sulzbodä

 

 

 uus: Dr ghülptet Bott, Sulzbodä-Ziitig 1982, Siitä 28


 

Samstag, 1. Januar 2022 Neujahr

 

Silväschterschällä

 

All Jahr äm letschtä Taag im Jahr

Und zwaar schu härrgottsfrüä,

dä chunnt ä wagg’ri Goofäschaar

mit Plumperä vu Chuä.

 

Si schälled dä i tunggler Nacht

dur d Schtraassä rudelwiis;

und schälled, bis-mä d Tüür uufmacht

und nachhäär sind-si liis.

 

Ä Truubäsaft, ä Wurscht und Broot,

tigg öppä Brüüt mit Anggä,

ä Schoggi tuät’s dä-n-ä zur Noot,

dä gönd.s’ und säged:«Tanggä!»

 

-y.

 


 

Nüüjahrsmorgä

 

Chuum isch Silväschter nämä durä,

isch p Birä we-n-ä Schtäi,

die mäischtä sind dä-n-uff dr Schnurä

und chänd dä  kniibel häi.

 

Si gönd mit zant dä Schuä gu liggä,

und schnarchled, o-herjee!

und lönd-si nämä nümmä bliggä,

’s isch alles jemineee!

 

Äs fröschtälet äim zant-dr Teggi,

ä mängem isch-es schlächt;

und  p Muäter säit: Daa häsch äs Beggi!

Für waas brucht’s daas etz ächt!?

 

-y.

 

aus "Fridolin" ,10. Januar 2008 Nr. 2

 

 

Nüüjahrsmorgä!

 

Äs Schtäubli fiinä wiissä Schnee

we Zugger uff p Paschteetä,

vrzuggäret ds Nüüjahr, juhee!

und alles, was-mä gseht-dä.

 

Und d Sunnä schtrahlet wiiss und hell,

ds Nüüjahr chunnt etz uf d Wält

(daas gseht au, wer’s nüd wahr haa well),

und güggslet dur all Schpält!

 

Au p Bäum sind wiiss und d Schtraassä-n-au,

und silberig dr Gläärnisch,

ds Nüüjahr – so gmergget Maa und Frau –

mäint’s nämä würggli äärnisch’.

                                                          

-y.

 

aus Fridolin", 8. Januar 2009 Nr. 2

  


Sonntag, 2. Januar 2022

 

Chlepferii schtatt Gloggäglüüt

 

Zum Jahres-Uusklang ghörp-p-mä ds Glüüt

und nachem Zwölfischlaag

gkörsch ds Iiglüüt, abr daasmaal nüüt,

as nu ä luuti Blaag.

 

Schu schiär dr Altjahr-Aabed läng,

d Lüüt sind ja dä-n-äm Fäschtä,

machts nüüt as "pumm!" und "chlepf !" und "päng!"

bis d Nasä vollä häsch-dä.

 

Zum Himel schtiiged tuusig Schwärmer,

äs chnorzgäret und chnellt,

und d Lüüt sind nu nuch eeländ Lärmer! 

Isch daas nuch alls, wo zellt?

 

-y.

... am andern Morgen...  ä guäts Nüüs und ä Gegeloornig!
... am andern Morgen... ä guäts Nüüs und ä Gegeloornig!